శ్రీశైలం, మన భద్రాద్రి వెబ్ డెస్క్: తెలంగాణలోని శ్రీశైలం ప్రాంతానికి చెందిన ప్రముఖ గ్రామాలు ఈగలపెంట, దోమలపెంట ఇకపై ఆ పేర్లతో ఉండకపోవచ్చని అచ్చంపేట ఎమ్మెల్యే వంశీకృష్ణ తెలిపారు.
ఆయన ప్రకారం, ఈ గ్రామాల పేర్లు ఇప్పుడు అధికారికంగా మార్చబోతున్నారు. స్థానికులు తరచూ వినిపించే ఈగలపెంట, దోమలపెంట పేర్ల స్థానంలో భవిష్యత్లో బ్రహ్మగిరి, కృష్ణగిరి అనే పురాతన పేర్లు తిరిగి తీసుకురానున్నారు.
చరిత్రను గుర్తు చేస్తూ మార్పులు…
1963లో శ్రీశైలం ప్రాజెక్టు నిర్మాణ సమయంలో బ్రహ్మగిరి, కృష్ణగిరి పేర్లు తొలగించి ఈగలపెంట, దోమలపెంటగా మార్చారని వంశీకృష్ణ వెల్లడించారు. అయితే, అసలు చరిత్రను నిలుపుకోవాల్సిన అవసరం ఉందని భావించిన ప్రభుత్వం ఈ మార్పులు చేయాలని నిర్ణయించినట్లు తెలిపారు. పంచాయతీ రాజ్ చట్టం 2018 ప్రకారం అధికారికంగా పేర్లను మార్చేందుకు అంగీకారమిచ్చారు.
ప్రభుత్వ అధికారిక బోర్డులలో మార్పులు..
పేరుల మార్పును అధికారికంగా అమలులోకి తీసుకురావడాన్ని రాష్ట్ర ప్రభుత్వం ప్రారంభించింది. సంబంధిత గ్రామాల ప్రజలకు సమాచారం ఇచ్చి, త్వరలోనే ప్రభుత్వ కార్యాలయాల బోర్డులు, పాఠశాలల పేర్లు, ఇతర అధికారిక డాక్యుమెంట్లలో ఈ మార్పులు చేపడతామని వంశీకృష్ణ స్పష్టం చేశారు. ఈ మార్పులతో ప్రాంతీయ గౌరవం పెరిగే అవకాశం ఉందని ఆయన అభిప్రాయపడ్డారు.
