తెలంగాణ రాష్ట్రంలో నూతన రెవెన్యూ చట్టం ‘భూభారతి’ (Bhu Bhrathi) అమలులో భాగంగా రాష్ట్రవ్యాప్తంగా ఈ రోజు నుంచి రెవెన్యూ సదస్సులు నిర్వహించనున్నట్లు రాష్ట్ర రెవెన్యూ శాఖ మంత్రి పొంగులేటి శ్రీనివాసరెడ్డి (Ponguleti Srinivasa Reddy) వెల్లడించారు. ఈ చట్టాన్ని ప్రజల్లోకి విస్తృతంగా తీసుకెళ్లేందుకు సోమవారం రాష్ట్ర సచివాలయంలో రెవెన్యూ అధికారులతో మంత్రి సమీక్షా సమావేశం నిర్వహించారు.
సమావేశంలో మాట్లాడుతూ మంత్రి శ్రీనివాసరెడ్డి, “గత ప్రభుత్వం తీసుకున్న అనాలోచిత నిర్ణయాల వల్ల రైతులు భూ సమస్యల్లో చిక్కుకున్నారు. రెవెన్యూ వ్యవస్థలో ఆ రోజుల్లో జరిగిన తప్పిదాలను సరిదిద్ది, భూ పరిపాలనను ప్రజలకు సమీపంగా తీసుకెళ్తున్నాం. ఈ లక్ష్యంతో ఏప్రిల్ 14న ముఖ్యమంత్రి రేవంత్ రెడ్డి భూభారతి చట్టాన్ని ప్రారంభించారు. పైలట్ ప్రాజెక్ట్గా జిల్లాకో మండలంలో ఈ చట్టాన్ని అమలు చేశాం. ఇప్పుడు జూన్ 3 నుంచి 20 వరకు ‘ప్రజల వద్దకే రెవెన్యూ’ నినాదంతో రాష్ట్రంలోని మిగిలిన మండలాల్లో సదస్సులు నిర్వహిస్తాం” అని తెలిపారు.
ప్రతి రెవెన్యూ గ్రామానికి తహసీల్దార్ నేతృత్వంలో ఒక బృందం వెళ్లి, ప్రజల నుంచి భూ సమస్యలపై దరఖాస్తులు స్వీకరించి, వాటిని పరిష్కరిస్తుందని మంత్రి వివరించారు. “పైలట్ మండలాల్లో 55,000 దరఖాస్తులు రావడం భూ సమస్యల తీవ్రతను చూపిస్తుంది. ఇప్పటివరకు వచ్చిన దరఖాస్తుల్లో 60% సమస్యలను పరిష్కరించాం. అధికంగా సాదాబైనామా సంబంధిత దరఖాస్తులు ఉన్నాయి. ఈ దరఖాస్తులను ఆన్లైన్లో నమోదు చేస్తున్నాం” అని ఆయన చెప్పారు.
జిల్లా కలెక్టర్లు భూ సమస్యలను మానవీయ దృక్పథంతో పరిష్కరించాలని, క్షేత్రస్థాయిలో నిరంతరం పర్యటించి సమస్యలపై దృష్టి సారించాలని మంత్రి సూచించారు. ఇటీవల ఎంపికైన గ్రామ పంచాయతీ ఆఫీసర్ల (జీపీవోల)కు త్వరలో నియామక పత్రాలు అందజేయనున్నట్లు తెలిపారు.
భూభారతి చట్టంలో భాగంగా, భూముల రిజిస్ట్రేషన్ సమయంలో సర్వే మ్యాప్ను డాక్యుమెంట్లతో జతచేసే కొత్త విధానాన్ని ప్రవేశపెట్టినట్లు మంత్రి వెల్లడించారు. “ఈ విధానం భూ సమస్యలను తగ్గించడంలో సహాయపడుతుంది. భూ కొలతలు మరియు దస్త్రాల నిర్వహణ కోసం రెవెన్యూ శాఖను బలోపేతం చేసేందుకు, రాబోయే రెండు నెలల్లో మొదటి దశలో 6,000 సర్వేయర్లను నియమిస్తాం” అని ఆయన పేర్కొన్నారు.
, Telangana){kind=link}